காப்பகம்

பணத்திற்கு பல பெயர்கள்

பணத்திற்கு பல பெயர்கள்

கோயிலுக்கு காணிக்கை

வறியவனுக்கு பிச்சை    

அரசன் கொடுப்பது பொற்கிழி

 

உலோகத்தால் செய்தது நாணயம் (அக்கம்)

கடதாசியில் அடித்தது தாள்

பத்திரிகையில் கையொப்பமிட்டது காசோலை

இணயத்தில் பரிமாறல் “பிட் நாணயம் (bit coin)

வெளிநாடுகளுடன் அந்நிய செலவாணி

 

சிற்றரசன் பேரரசனுக்கு கப்பம்

அரசாங்கத்திற்கு   கொடுப்பது வரி

அதிகாரிக்கு கொடுப்பது லஞ்சம்

நீதிமன்றத்தில் அது அபராதம்

அடுத்தவரிடம் கேட்பது கடன்

கடனுக்கு பிடிப்பது வட்டி

 

திருமணத்தில் அது வரதட்சனை

விவாகரத்தில் சீவனாம்சம் (alimony)

முற்பணமாக அட்சவாரம் (advance)

புதுவருடத்தில் கைவியளம் (கைவிசேடம்)

சிறு பிள்ளைக்கு கைப்பணம்

 

நாளாந்த தொழிலாளிக்கு கூலி

மாதந்த தொழிலாளிக்கு வேதனம் (சம்பளம்)

இளைபாறியோர் பெறுவது ஓய்வூதியம்

வரவு செலவுக்கு கணக்குப்பிள்ளை

கொடுக்கல் வாங்கல்: தனாதிகாரி

நாட்டிற்கு அதுவே நிதி அமைச்சர் 

 

சபா-தம்பி 2016

panam

 

பணத்தோடு சம்பத்தப்பட்ட  பாடல்கள்  சில:

 

 

 

நாதஸ்வரத்தில் திரைப்பாடல்

வரியந்தோரும் நடக்கும் யாழ்ப்பாணக் கோவில் திருவிழாக்களில் தவில் நாதசுர கச்சேரிகள் சகஜம். கோயில்களுக்கேற்ப 10, 15,25 நாட்களென திருவிழாக்கள் தொடரும். திருவிழாக் கடைசி நாட்களில் முக்கியமாக சப்பறம், தேர், தீர்த்தம் , பூங்காவனம் போன் ற  திருநாட்களில் பல தவில் நாதஸ்வர வித்துவான்கள் கச்சேரிக்கு வருவார்கள்.  இவர்கள் கச்சேரி, கடைசியில் மேளச் சமாவுடன் முடிவு பெறும்.

பிரசித்தி பெற்ற யாழ்  நல்லூர் கந்தசுவாமி கோவில் திருவிழாக்களில் 23ம் நாள் தேர் உற்சவம் நடைபெறும். காலையில் தேர் இழுத்த பிற்பாடு,  பிற்பகலில் சாமி இறக்குவதற்கு முன் தவில் /நாதஸ்வரக் கச்சேரி  மிகவும் ஆவலுடன் எதிர்பார்க்கப்படும்.  இது இலங்கை வானொலியில் அநேகமாக ஒலிபரப்பப்பட்ட காலமும் உண்டு. (தற்போதய நிலை தெரியாது).

கிராமப்புற கோவில் திருவிழாக்களில் தவில் கச்சேரிக்குப் பின்னால்  “சின்ன மேளம்” நடனக்குழு, பொப் இசை பாடல் குழு என இத்தியாதி இத்தியாதி. இதற்காக இரசிகர் கூட்டம் பல தூர இடங்களில் இருந்து படையெடுக்கும். இதைவிட இலங்கை இந்திய புகழ் பெற்ற யாழ் மகன்  தட்சனாமூர்த்தியின் கச்சேரிக்கு சொல்லவா வேண்டும். தவில் மேதையை பார்ப்பதற்கென்றே மக்கள் கூட்டம் வாரி வாரியாக வந்திறங்கும்.

சிறுவயதில் மீசாலையில்  வெறுங்கால்களுடன் மணல் வீதிகளை உலாத்தி  வெள்ளை மாவடி பிள்ளையார் கோவில் திருவிழாக்களை பார்த்த காட்சி இன்றும் பசுமையாக நினைவில் உள்ளது.  சாவகச்சேரி நாதஸ்வர  வித்துவான் ஸ்ரீ பஞ்சாபிகேசன், கோண்டாவில் பாலக்கிருஷ்ணன் நாதஸ்வர சகோதரர்கள், தவில் கணேசன், கானா மூர்த்தி – பஞ்சமூர்த்தி சகோதரர்கள் இப்படிப் பலப் பல கலைஞர்கள்….

இக்கோவிலில் பல  தவில் கச்சேரிகள் நடைபெறும். மாலை 6 மணிக்கு  தொடங்கும் கோலாகலம் விடிய விடிய தொடரும்.ஒரு தவில் நாதஸ்வர குழுவிற்கு சுமாராக ஒரு மணி நேரம் ஒதுக்கப்படும். கச்சேரிகள் கடவுள் வாழ்த்துடன் ஆரம்பித்து கீர்த்தனைகள் வாசித்து கடைசி 10 – 15 நிமிடங்கள் திரைப்பட மெட்டிற்கு ஒதுக்கப்படும். இளவயது ரசிகர்களுக்கு இது மிகவும் பிடித்தமான நேரம். நடுச் சாமத்தில் பாதி கண் மூடி கோழித்தூக்கம் போட்டவர்கள், கச்சான் கொறித்துக் கொண்டிருப்பவர்கள், ஊர்க்கதை அலட்டிக் கொண்டிருப்பவர்கள்  எல்லாம்  நாதஸ்வரத்தில் திரைமெட்டு தொடங்கியவுடனேயே பரபரப்பாக விழித்துக்கொள்வார்கள், திரைமெட்டைக் கண்டு பிடித்தவுடனே கூட்டத்தில் கைதட்டல் தொடங்கிவிடும். தில்லானா மோகனாம்பாள், திருவிளயாடல் திரைப்படப் பாடல்கள், இதை விட சிங்காரவேலனடி தேவா, அதிசயராகம் (அபூர்வ ராகம்) போன்றமெட்டுக்கள் பிரபலம்.

இவையெல்லாம் பார்த்து பலவருடங்களாகி விட்டன. போர்க் காலங்களில் திருவிழாக் கச்சேரிகள் பகல் வேளையில் வைக்கப்பட்டதாக கேள்விப்பட்டேன். யதேட்சையாக முகநூலில்  கீழ்வரும் காணொலியை பார்த்தவுடன்  பழைய நினவுகள் கொடி கட்டிப் பறக்கின்றன.  இந்தக் காணொலியும் யாழ்ப்பாணத்தில் குமரன் குழுவினர்களால் வாசிக்கப்பட்டது என்பது முகநூல் தகவல்கள். இதில் உள்ள நாதஸ்வர வித்துவான் வேறுயாருமல்ல. புகழ்பெற்ற நாதஸ்வர வித்துவான் பஞ்சமூர்த்தியின் புதல்வன்! நான் கேட்டு ரசித்தது போல் நீங்களும் கேட்டு ரசியுங்கள்..

நன்றி: முகநூல்- தமிழ் வானம்

 

குருடன்  யானையை பார்த்ததைப் போல்……

உத்தம வில்லன் படம் வரு முன்னரே திரைப் படத்தை முழுமையாக இருந்து பார்தவர்கள் போல் சமூக வலைத்தளங்களில் பற்பல விமர்சனங்கள் – பார்த்தது என்னமோ விற்பனைக்காகவே வகையறுக்கப்பட்ட ட்ரய்லர்களும் (Trailers) படத்தில் இடம் பெறும் சில திரைப்பட பாடல்களும் மட்டும் தான்.

படத்தை இயக்கும் நடிகர் அவர் துறையில் சிறந்தவர் என்பதில் ஐயமே இல்லை. இதனால் அவரின் படைப்புககளுக்கு எதிர்பார்ப்புகள்அதிகம். அதற்காக குருடர்கள் யானையை பார்த்தது போல் படம் வரும் முன்னரே விமர்சனகளை அள்ளி வீச வேண்டுமென்பதில்லை.
அதை விட்டுவிட்டு திரைப்படம் வந்தபின் அதைப் பார்த்து விட்டு விமர்சனக்களை முழுமையாக எழுதினால் என்ன?

தற்போது யாரும் சமூக வலைத்தளங்களில் விமர்சனம் எழுதிக் குவிக்கலாம் எனும் நிலை. விமர்சனங்களை எழுதவேண்டாம் என்று சொல்லவில்லை. எழுதுங்கள் ஆனால் முழுமையாக பார்த்து விட்டு எழுதுங்கள். யாருடய விமர்சனம் முதன் முதலில் தளத்தில் ஏற்றப்படுகிறது என்ற போட்டியை விட்டு விட்டு தரமான விமர்சனங்களை எழுதினால் எல்லோருக்கும் நன்மை உண்டு.

குஞ்சுகள் முட்டையிலிருந்து வெளிவருமுன்னரே கோழிக் குஞ்சுகளை எண்ணும் நிலை மறையவேண்டும்.

சபா- தம்பி
மார்ச் 22. 2015.

டுவிட்லாங்கர்(Twitlonger) இல்:

Read: குருடன் யானையை பார்த்ததைப் போல்……

கார்த்திகைக்கு இரண்டு குத்து!

குத்து என்றதும் “டிஷ்யூம்” “டிஷ்யூம்” குத்து சண்டை அல்லது நயனின் குத்து பாட்டு என்று எண்ணி விடாதீர்கள்.

நான் குறிப்பிடுவது உயிர் மெய்யெழுத்துக்களின் புள்ளிகள்!

பதின்ம வயதில்  சூப்பர்(G)குளூ மாதிரி (super Glue) மூளையில் ஒட்டிய ஓர் இலக்கண பகிர்வு.

மெய்யெழுத்துக்களின் புள்ளிகளை ஒற்றுக்கள் என்றும் அழைப்பர். ஒரு சொல்லில் இரண்டு புள்ளிகள் அருகருகே அமைந்தால் அவை ஈரொற்றுக்கள் என அழைப்பதாக ஞாபகம்.

அப்ப கார்த்திகைக்கு இரண்டு குத்து என்றது சரிதானே.

 

அந்த வகையில் சில ஈரொற்று சொற்கள் பின்வருமாறு:

(ர்த்) : கார்த்திகை, பார்த்தேன், அர்த்தம்

(ர்க்) : சர்க்கரை, அமர்க்களம், ஈர்க்கு

(ர்ப்) : சர்ப்பம், சந்தர்ப்பம், ஈர்ப்பு, தீர்ப்பு

(ழ்ச்) : புகழ்ச்சி, இகழ்ச்சி, மகிழ்ச்சி

(ர்ந்) : அமர்ந்

கார்த்திகை விரதம், கார்த்திகை தீபம், கல்யாண சீசன் என மிகவும் அமர்க்களமான கார்த்திகை மாதத்தில் பூக்கும் பூவிற்கும் பெயர் கார்த்திகைப்பூ!

தமிழ் நாட்டின் மாநில பூவாக பிரகடனம் செய்த மலருக்கு தாவரவியல் பெயர் (குளோறியோசா சுப்பேர்பா – Gloriosa Superba).  லில்லி (Lily) குடும்பத்தை  சேர்ந்த கிழங்கு தாவரத்தின் பூ, தமிழ் இலக்கியங்களில் காந்தள் (செங்காந்தள், வெண் காந்தள்) என குறிபிடப்பட்டுள்ளது.

https://www.flickr.com/photos/lorindalee/5905812185/sizes/z/in/photostream/

 

photo credit: Garden Queen

நச்சுத் தாவரமான கார்த்திகைக் கொடியின் சிறப்பு அதன் இலை நுனிகள், தந்து ஆக திரிபடைந்து,  கொடிக்கு  பற்றியேற உதவுகிறது.(tips of the leaves are modified as tendrils to climb)

ஈரொற்றுக்கள் வரும் கார்த்திகையை குறிப்பிட்டு விட்டு, தமிழ் திரைப்பாடலை குறிப்பிடாமல் விடுவது முறையா?

‘கார்த்திகை மாதம்’ என்று ஆரம்பிக்கும் பாடலையும் கேட்டுத்தான் பாருங்களேன்

 

படம்: வைர நெஞ்சம் (1975),

பாடியவர்கள்: T.M. சவுந்தரராஜன் & L.R. ஈஸ்வரி

பாடலாசிரியர்: கவியரசு கண்ணதாசன்

இசை: M. S. விஸ்வநாதன்

 

வாற்செட்டை:

கடந்த வருடம்  “நாலு வரி நோட்டு” இணயத்திற்கு எழுதிய கிறுக்கல். நேரம் தாமதமானதால் பிரசுரிக்கப்படவில்லை. அதனால் இந்த கார்த்திகைக்கு உங்களோடு பகிர்ந்து கொள்கிறேன்.)

கீறல்கள்- கமல் ஹாசன் (Two sketches of Kamal)

கமலுக்கு வயது  60!

நம்பவே முடியவில்லை.

இப்போது நினைத்தாலும் சிரிப்பு வருகிறது.

அந்தக் காலத்தில் கமல ஹாசன் மீது இருந்த டீன் ஏஜ் கிரேஸ் (teennage craze!)

யாழ்ப்பாணத்தில், கடந்த நூற்றாண்டின் எழுபதுகளின் மத்தியில் இருக்கும்.

கொஞ்சம் தமிழர்களின் நிம்மதியான காலம்.

எப்போதுமே MGR, சிவாஜி முகங்களை திரையில் பார்க்கும் அலுப்பு.

அதுவும் வயதில் முதிர்ந்தவர்கள் இளவயது நடிகைகளுடன் நெருங்கி நடிக்கும் காலகட்டம்.

ஒரே Dull!

அங்காங்கே பொங்கலுக்கு பயற்றம் பருப்பை சேர்த்தால் போல் முத்துராமன், ஜெய்சங்கர் படங்கள்.

இக் கால கட்டத்தில் ரசிகர்களிடையேயும் ஒரு திருப்பம்.

பிரபல நடிகர்களுக்காக படம் பார்க்காமல் இயகுநர்களுக்காக படம் ஓடத்தொடங்கிய நாட்கள். இதில் முதலிடம் பெற்றவர்கள் ஸ்ரீதர், கே. பாலசந்தர் போன்றோர்.

 

இந் நேரத்தில் தான்  தமிழ் திரையுலகில் ஓர் புதுமுகம்.

மிகவும் இளையவர்.

சிறு வேடங்களில் பலபடங்களில் தலை காட்டியவர்.

இளவயது பெண் ரசிகர்களுக்கிடயே பிரபலமாகிக் கொண்டிருந்தவர்.

யாழ்ப்பாணத்தில் முதல் முதலாக எனக்கு பார்க்க கிடைத்த அவருடைய படம்: அவள்-ஒரு-தொடர்கதை.

விகடகவியாக காந்திக் கண்ணாடியுடன் நடித்த பாத்திரம்.

 

 பாடல்:  கடவுள் அமைத்து வைத்த மேடை, படம்: அவள்-ஒரு-தொடர்கதை.

இப்படம் 75 – 76 களில் யாழ்-டவுன் பஸ் தரிப்பு நிலையத்திற்கு பக்கக்தில் உள்ள ராணி தியேட்டரில் ஓடிய நினைவு.

தியேட்டருக்கு முன் நடிகை சுஜாதாவின் மிகவும் பிரமாண்டமான கட்-அவுட் (wooden cut-out) அலங்காரம்.

சனிக்கிழமை மட்னீ ஷோ (matinee show) – சாம் மாஸ்டரின் கெமிஸ்ரி டியூஷன் கிளாஸ் முடித்து, (Sam Master’s Chemistry tuition class) சொந்தங்களுடன் சுண்டிக்குளியில் இருந்து பஸ் பிடித்து போய் பார்த்த நினைவு.

இப்படம் யாழ் தியேட்டர்களை எட்ட முதலே இள நடிகரின் தகவல்கள் வீரகேசரி, தினகரன் நாளிதழ்களில்  மிகவும் பிரபல்யம். விகடகவியின் முன்னேற்றம் அபூர்வராகத்தில் தொடங்கி, டொன்-டொ-டாங்க் சொல்லத்தான் நினக்கிறேன், மூன்று முடிச்சு, மன்மதலீலை எனப் பல…

அந்தக் காலத்தில் பொழுதுபோக்கு என்பது பேப்பர்கள் புத்தகம் வாசிப்பது, இலங்கை வானொலி கேட்பது அல்லது சினிமா பார்ப்பது தான். இதுவும், குடும்ப – பணப்பையின் பருப்பத்தை பொறுத்தே நிர்ணயம். இதனால் மாணவர்களுக்கு வகுப்பில் பகிரப்படும் இலவச, பிய்ந்துபோன குமுதம் ஆனந்த விகடன் போன்றவற்றிற்கு மிகவும் மவுசு.

 

நமக்கு அவ்வளவாக ஓவியம் ஓடாது.

இன்றும் நன்றாக நினைவிருக்கிறது- Botany பாடத்திற்கு பாவிக்கும் வீனஸ் பென்சிலைப் (Venus brand pencil) பாவித்து, கையில் அகப்பட்ட சஞ்சிகையில் இருந்த கமலின் உருவத்தைப் பார்த்து கீறிய  கோடுகள்.

ஒரு பக்கம் எழுதிய வெள்ளைத்தாளின் மறு பக்கத்தில்,

eraser ஆல் அழித்து அழித்து கீறிய நினவு.

அடுத்தநாள் வகுப்பில் கொஞ்சம் ஒவியத்தில் திகழ்ந்த வாசுகியின்- டிப்ஸ் (tips) இல் சரியானது எனது மாஸ்டர் பீஸ் (Master piece).

இது trace செய்த கீறல்கள் அல்ல. பென்சிலின் அடிப்பகுதியை வைத்து சிறிது சிறிதாக அளவெடுத்துக் கீறியது.

 

பென்சில் கீறல்கள் (இளவயதுக் கமல்)

பென்சில் கீறல் (40  வருடங்களுக்கு முன்பு)

பென்சில் கீறல் (40 வருடங்களுக்கு முன்பு)

விஷயம் என்னவென்றால் இப்படி வரைந்த எனது சில கீறல்கள் சில  புத்தகங்களுடன்  அவுஸ்திரேலியாவிற்கு 28 வருடங்களின் முன்பு பயணப்பட்டுவிட்டன.

கீறியது கிடத்தட்ட 40 வருடங்களின் முன்பு.

 

சமீபத்தில் எனது பழைய பொட்டலங்களை தூசு தட்டும்போது கிடைத்த  இரு கீறல்களை நடிகரின் 60ம் பிறந்த நாளில் எனது பதிவில் பகிர்ந்து கொள்கிறேன்.

50 வருடங்களுக்கு மேல் எமக்கு திரையுலகம் மூலம் எல்லோருக்கும் களிப்பை தந்த கமல் ஹாசன் நடிகருக்கு எனது வாழ்துக்கள்.  மேலும் வயதுக்கு ஏற்ற நடிப்பை தொடர்ந்து ரசிகர்களுக்கு கொடுக்க முன்னாசிகள் பல.

 

நன்றி.

நொவம்பர் 7, 2014

உல்லாசம் பொங்கும் இனிய தீபாவளி வாழ்த்துக்கள்!

ஊரெங்கும் ஒன்றாகக் கலந்து உறவாடும் தீபத் திரு நாளில்
எங்கிருந்தாலும்
பூப்போல சிதறும் மத்தாப்புக்களுடன்
 கொண்டாட, எனது  மனமுவந்த

தீபாவளி வாழ்த்துகள்!